Dowlada Itoobiya ayaa shaacisay in bukaankii ugu horreeyay uu dalkaas ugu geeriyooday cudurka Coronavirus ee caalamka dhibaatada ba’an ku haya.
Sidoo kale guddiga dowlada Itoobiya ugu qaabilsan la dagaalanka Coronavirus ayaa xaqiijiyay iney heleen 5 kiis oo kale, kuwaasoo tirada guud ee dadka laga helay cudurkan gaarsiiyey 43 ruux guud ahaan dalka Itoobiya.
Raisul Wasaaraha Itoobiya Abiy Ahmed oo xalay shacabka dalkaas kala hadlay warbaahinta ayaa sheegay in dowladiisu ay ku dedaaleyso in la xakameeyo faafida cudurkan, isagoo shacabka ugu baaqay iney qaataan talaabooyinka badqabka ee looga hortago cudurkan.
Dhamaan dalalka geeska afrika ayaa laga helay cudurkan inkastoo tirooyinka la helay ay kala badan yihiin, waxaana ugu badan Kenya oo laga helay ku dhowaad 120 kiis, 7 qof ayaana u dhintay, Jabuuti ayaa xigta oo 51 kiis diiwaan gelisay, hal qofna uu u dhintay, waxaana ugu yar Somalia oo illaa hadda laga helay 7 kiis, iyadoo aysan jirin cid u dhimatay.
About Author
