Post View....

Kate Foster oo musharixiinta ku qancisay sababta ay Farmaajo ugu wareejisay warqadaha aqoonsiga safiirnimo!

0
99

Safiirka cusub ee Ingiriiska u fadhisa Soomaaliya, Kate Foster, ayaa kulan dhanka Internet-ka la qaadatay xubnaha Golaha Murashaxiinta Madaxweynaha si ay uga wada hadlaan ismariwaaga siyaasadeed ee Soomaaliya iyo sida loogu gudbi karo .

Golaha Midowga Musharixiinta ayaa safiirka waydiiyay sababta ay warqadaha aqoonsiga safiirnimo ugu wareejisay Maxamed Cabdullaahi Farmaajo madaxweynaha Mudo xilleedkiisu dhamaaday.

“Kulan wax ku ool ah oo aan la yeelanay Golaha Murashaxiinta Madaxweynaha goor hore. Waa muhiim in dhammaan codadka la maqlo. U.K waxa ay ku boorinaysaa dhammaan dhinacyada in ay sii wadaan wadahadalka isla markaana la helo waddo loo maro in la gaarsiiyo doorashooyin lagu kalsoonaan karo oo loo wada dhan yahay.” Ayay Foster ku tiri qoraal ay barteeda Twitterka ku soo qortay.

Hoggaamiyaha xisbiga mucaaradka ah ee Wadajir Cabdiraxmaan Cabdishakuur Warsame oo xalay ka qeybgalay dood lagu qabtay bar-kulanka Club House  ayaa sheegay in ay safiirka cusub waydiiyeen sababta ay warqadaha aqoonsiga ugu wareejisay madaxweynaha Mudo xileedkiisu dhamaaday balse ay bixisay jawaab ay ku qanceen sida uu hadalka u dhigay.

Warsame oo la waydiinayay su’aalo toos ah ayaa sheegay in Kate Foster ay ku qancisay in aysan dalka ka shaqayn karin iyada oo aan warqadaha aqoonsiga ku wareejin madaxweynaha mudo xilleedkiisu dhamaaday iyada taas xeerinaysana ay go’aanka wareejinta warqadaha aqoonsiga u qaadatay.

Waxa uu sheegay iyaga oo qadarinaya kaalinta beesha caalamka isku keenida dhinacyada siyaasadda Soomaaliya ku qanceen cudur daarka safiirka Cusub ee Ingiriiska u fadhiya Soomaaliya.

Foster waxay waraaqihiisa aqoonsiga u gudbisay Madaxweyne Farmaajo Arbacadii. Khamiista, waxay horey u sii diyaarisay fadhi ay la yeelato madaxweynaha maamul goboleedka Jubaland Axmed Madoobe Isniinta magaalada Muqdisho si loo dhageysto mowqifkiisa ku aadan carqaladeynta doorashada.

Kate Foster waxa ay bedeshay Ben Fender, oo safiir ahaa tan iyo Febraayo 2019.

 

About Author